Давайце знаёміцца: гурток «Станковая графіка» (Мінск)

Праект «На сваёй зямлі» мае даўняе сяброўства з гурткамі і студыямі Нацыянальнага цэнтра мастацкай творчасці дзяцей і моладзі ў Мінску. У нашай рубрыцы  «Давайце знаёміцца» хацім прадставіць вам адзін з іх – гурток «Станкавая графіка» пад кіраўніцтвам мастака-графіка, сябра Беларускага саюза мастакоў Юліі ШАЦІЛА.

Гурток адкрыўся ў Мінску ў 2007 годзе. Яго наведваюць дзеці ад 5 год і творчая моладзь да З0 год. На занятках яны асвойваюць тэхніку лінагравюры, манатыпіі і альтэрнатыўныя тэхнікі графікі.

Студэнты мастацкіх навучальных установаў у гуртку маюць магчымасць перавесці ў матэрыял свае творчыя працы, вучэбныя заданні, папрацаваць над копіяй добрага твора, уявіць і адчуць спецыфіку працы мастака-графіка.

Для моладзі, што не займаецца мастацтвам прафесійна, гурток адкрывае багаты свет выяўленчага мастацтва ўвогуле. Маладыя людзі робяць уласныя творчыя працы і спрабуюць выразаць іх у тэхніцы лінагравюры. Яны таксама знаёмяцца з гісторыяй мастацтва, тутэйшымі і замежнымі мастакамі: класікамі і сучаснікамі, графікамі і тымі, хто працуе ў іншых відах выяўленчага мастацтва.

Дзеці ж на занятках больш за ўсё захопленыя тэхналагічным працэсам працы: шліфоўка лінолеума, праца  разцамі, друк адбіткаў – такі досвед не набудзеш самастойна дома альбо на ўроках у школе. Хлопчыкам асабліва падабаецца, што працэс працы разцамі патрабуе і пэўных фізічных намаганняў. Правесці лінію алоўкам і  выразаць яе на лінолеўме – розныя рэчы!

Аб’ядноўвае ўсе ўзросты вялікая цікавасць да выніка працы.  На пачатку вучобы ён падаецца непрадказальным і ў працэсе працы не відаць. І толькі пры друку адбітка  можна ўбачыць тое, над чым так натхнёна працаваў!

Гурткоўцы актыўна і плённа ўдзельнічаюць у выставах і конкурсах у Беларусі і за межамі. Творы, зробленыя ў гуртку, экспанаваліся ў Расіі, Украіне, Польшчы, Славакіі, Францыі і Чэхіі.