Мінск – Уфа: новы маршрут на карце праекта «Арт – транзіт»

Работы пераможцаў Міжнароднага конкурсу жывапісу і графікі «На сваёй зямлі» прадстаўленыя на выставе «Дзіцячая друкаваная графіка Уфа 2013», што праходзіць з 25 мая па 1 чэрвеня ў Нацыянальнай бібліятэцы імя Ахмет-Закі Валідзі Рэспублікі Башкартастан у межах творчага праекта «Арт – транзіт».

Экспазіцыю складаюць работы юных мастакоў з Беларусі (Віцебск,  Мазыр), Індыі (Хайдарабад), Польшчы (Рыбнік), Расіі (Масква, Уфа, Омск, Борзя, Бірабіджан) і Сербіі (Субоціца). Пэўна, большасць удзельнікаў праекта «На сваёй зямлі» з гэтымі гарадамі ўжо даўно знаёмая – сваеасаблівая і непаўторная друкаваная графіка з гэтых мясцінаў кожны год упрыгожвае выніковую выставу конкурсу. З конкурсам цесна звязаны і сам праект  «Арт – транзіт».

Мэта праекта – пазнаёміць са шматстайнымі магчымасцямі ў тэхніках: лінагравюра, каляровая лінагравюра, гравюра на кардоне, афорт, сухая ігла – а таксама непасрэдна з сакрэтамі і методыкамі мастацкіх школ і навучальных установаў з розных гарадоў і краін. Так, напрыклад, у гэты раз на адкрыцці выставы мастацкая школа «Художка» г.Уфы прэзентавала буклет «Ат эскіза да эстампа», што распавядае пра паэтапнае выкананне работ у тэхніках «чорна-белая лінагравюра» і «каляровая гравюра на знішчэнне».

З Уфы выстава накіруецца ў Омск.

Падрабязней пра праект «Арт – транзіт»