Адбылася працоўная сустрэча оргкамітэта конкурса "На сваёй зямлі"

Прадстаўнікі оргкамітэта Міжнароднага конкурсу жывапісу і графікі "На сваёй зямлі" і члены журы конкурсу з Беларусі сустрэліся 16 лістапада ў адукацыйным цэнтры Беларускага зялёнага крыжа, каб абмеркаваць пытанні, што тычацца работы журы.

Падчас сустрэчы было зацверджана палажэнне аб рабоце журы, у якім абумоўлены парадак фарміравання і склад журы, функцыі, механізм галасавання, а таксама сфармуляваны асноўныя крытэры ацэнкі конкурсных работ:

• Паўната раскрыцця аўтарскай задумкі.
• Арыгінальнасць кампазіцыйнага рашэння.
• Каларыстычнае рашэнне.
• Узровень валодання малюнкам, перспектывай, дэкаратыўнасцю (для старэйшых узроставых груп).
• Ярка выражаная індывідуальнасць.
• Самастойнасць выканання работы.

Таксама было ўзнята пытанне аб плагіяце, паколькі некалькі падобных выпадкаў было зафіксавана на конкурсе.

– Ацэньваючы конкурсныя работы, мы звяртаем на гэтую праблему асаблівую ўвагу, бо па ўмовах конкурсу работа мусіць быць творчай і самастойнай, – каментуе праблему старшыня журы Леанід ГОМАНАЎ. – Але, на жаль, не заўсёды атрымліваецца выявіць плагіят на стадыі работы журы – часта капіруюцца работы малавядомых мастакоў альбо нават дзіцячыя работы, што сталі пераможцамі ў іншых міжнародных конкурсах. Таму мы вырашылі вынесці праблему плагіяту на абмеркаванне падчас Міжнароднай канферэнцыі мастакоў-педагогаў, што пройдзе ў лютым 2012 г. Запазычаная работа, што патрапіла ў спіс пераможцаў, моцна кампраметуе і конкурс, і арганізатараў, і журы. Аднак болей за ўсё такія выпадкі адбіваюцца на рэпутацыі школы і педагога, пад кіраўніцтвам якога выконваліся такія работы.

Работа журы VII Міжнароднага конкурсу жывапісу і графікі "На сваёй зямлі" будзе праходзіць з 3 па 7 лютага 2012 г. у адукацыйным цэнтры Беларускага зялёнага крыжа. Пазнаёміцца са складам журы можна тут.