Падведзены вынікі конкурсу эсэ «Першая сусветная. Гарады і людзі»

Больш за сорак творчых работ з трох краін – Беларусі, Расіі і Малдовы – прынялі ўдзел у конкурсе эсэ, што праходзіў у межах Міжнароднага культурна-асветніцкага праекта «Перазоў стагоддзяў: Першая сусветная вайна і мір сёння».

Аўтарамі работ сталі людзі самага рознага ўзросту і роду дзейнасці, захопленыя тэмай Першай сусветнай вайны, а таксама гісторыяй сваёй сям'і і сваёй зямлі ў той складаны час.

Дзве тэмы, над якімі працавалі ўдзельнікі конкурсу, – «Сямейная лінія» і «Жывая гісторыя». Першая з іх прапаноўвала аўтарам звярнуцца да пачатку ХХ стагоддзя і паспрабаваць прасачыць лёс сваіх продкаў на драматычным ландшафце эпохі Першай сусветнай вайны. Другая, больш шырокая, заклікала да пошуку вакол сябе жывых ніцей, што яднаюць з мінулым – гісторыяй мясцінаў і рэчаў, лёсаў блізкіх і зусім незнаёмых людзей, што нясуць у сабе дух і абаянне эпохі.

Міжнароднае журы конкурсу, разглядаючы работы, ацэньвала адпаведнасць эсэ ідэі конкурсу, звяртала ўвагу на індывідуальнасць і глыбіню асэнсавання тэмы, арыгінальнасць падыходу, сюжэта і выкладання.

У склад журы ўвайшлі:

• Юрый МАКСІМЕНКА, вучоны сакратар Гомельскай абласной універсальнай бібліятэкі, старшыня Гомельскага гарадскога аддзялення Беларускай бібліятэчнай асацыяцыі (Гомель, Беларусь);
• Аляксандр ГРОНСКІ, кандыдат гістарычных навук, дацэнт кафедры гуманітарных дысцыплін Беларускага дзяржаўнага універсітэта інфарматыкі і радыёэлектронікі, намеснік загадчыка Цэнтра еўразійскіх даследаванняў Філіяла Расійскага дзяржаўнага сацыяльнага універсітэта ў Мінску, пазаштатны супрацоўнік Цэнтра ўкраіністыкі і беларусістыкі Гістарычнага факультэта Маскоўскага дзяржаўнага універсітэта імя М.В. Ламаносава (Мінск, Беларусь);
• Наталля ШМІДТ, галоўны бібліятэкар аддзела абслугоўвання, кіраўнік Цэнтра чытання Чалябінскай абласной універсальнай навуковай бібліятэкі, Заслужаны работнік культуры Расійскай Федэрацыі (Чалябінск, Расія).

Па рашэнні журы пераможцамі конкурсу сталі 15 эсэ. Іх аўтары будуць узнагароджаныя Дыпломамі, а астатнія атрымаюць Падзякі за ўдзел у конкурсе.

Спіс пераможцаў

Тэксты пераможцаў будуць апублікаваныя на сайце грамадскай арганізацыі «Беларускі зялёны крыж» www.greencross.by, сайце Міжнароднага мастацкага праекта «На сваёй зямлі» www.art-dialog.net і на старонцы праекта «Перазоў стагоддзяў» www.facebook.com/Dialogue.of.Centuries. Таксама аўтары работ запрошаны выступіць з дакладам на 2-я Міжнародныя грамадска-навуковыя чытанні «Перазоў стагоддзяў: Першая сусветная вайна і мір сёння», што пройдуць з 14 па 16 кастрычніка 2014 года ў Мінску.

Праграма чытанняў

Шчыра спадзяемся, што незалежна ад вынікаў кожны з удзельнікаў конкурсу сустрэў на сваім даследчым шляху неверагодныя адкрыцці і здолеў адчуць, наколькі цесныя ў гісторыя сувязі мінулага і сучаснага, наколькі моцныя ў нашым жыцці адгалоскі такіх далёкіх, і ўсё ж такіх блізкіх падзей.

ДЗЯКУЕМ УСІМ, ХТО АДГУКНУЎСЯ НА ТЭМУ КОНКУРСУ,
І ВІНШУЕМ ПЕРАМОЖЦАЎ!