Выстава «На сваёй зямлі» прайшла ў Віцебску

Цягам месяца, з 10 красавіка па 10 мая, у дзіцячай мастацкай школе г.Віцебска праходзіла выстава з фондаў Міжнароднага конкурсу жывапісу і графікі “На сваёй зямлі”. У прасторнай і светлай выставачнай зале школы было прадстаўлена 100 работ з 15 краін.

Адкрываць выставу ў горадзе, з гісторыяй якога так цесна звязаны імёны Іегуды Пэна, Марка Шагала, Казіміра Малевіча, – значная падзея для Міжнароднага мастацкага праекта “На сваёй зямлі”. Будынак школы, размешчаны па адрасе вул. Суворава, 3, таксама мае сваю гісторыю. З верасня 1923 г. па чэрвень 1941 г. тут месціўся Віцебскі мастацкі тэхнікум. У ім вучыліся выбітныя беларускія скульптары Заір Азгур, Андрэй Бембель, Сяргей Селіханаў, архітэктар і акадэмік Акадэміі мастацтваў СССР Уладзімір Кароль, а таксама знакаміты беларускі пісьменнік Васіль Быкаў.

Дырэктар Міхаіл КЛІМЕНКА вельмі рады прадставіць ў сценах сваёй школы работы пераможцаў конкурсу "На сваёй зямлі":

– З упэўненасцю магу сказаць, што падобнай выставы ў нашым горадзе яшчэ не было. Столькі краін, рэгіёнаў і мастацкіх школ сабрана ў адной экспазіцыі! Гэта цудоўная магчымасць і для дзяцей і для педагогаў пазнаёміцца з дзіцячай творчасцю з розных куткоў свету, са шматстайнасцю мастацкіх тэхнік і прыёмаў. І для жыхароў горада экспазіцыя будзе цікавай, бо выставы дзіцячых работ не так ужо часта праходзяць у нашым горадзе.

А для нас, арганізатараў праекта "На сваёй зямлі", выстава ў Віцебску – гэта яшчэ і добры прыклад супрацоўніцтва. Мы ўдзячныя калектыву дзіцячай мастацкай школы г.Віцебска за цудоўную выставу і за цёплы прыём на адкрыцці!

СПАДЗЯЕМСЯ, ШТО НАПЕРАДЗЕ НАС ЧАКАЕ ЯШЧЭ ШМАТ СУМЕСНЫХ ТВОРЧЫХ ПРАЕКТАЎ!