Творчы чалавек не ведае адпачынку. Гэта падцвердзілі юныя мастакі і іх педагогі, якія прыехалі 10 чэрвеня 2026 г. у цэнтр “Экалогія і здароўе” ГА БЗК на Міжнародны адкрыты пленэр-конкурс у рамках праекта “На сваёй зямлі”.

Любы мастак павінен умець засяроджвацца на аб'екце, быць назіральным і  ўважлівым да дэталяў. Развіццю гэтых навыкаў садзейнічае назіранне за жывой прыродай падчас пленэрнай работы. Акрамя таго, пленэр дапамагае і ў справе экалагічнага выхавання, звяртаючы ўвагу на прыгажосць роднай прыроды, яе каштоўнасць і важнасць клопату пра яе. Менавіта на гэты быў накіраваны Міжнародны адкрыты пленэр-конкурс, у якім прынялі ўдзел дзеці з мастацкіх школ і студый Мінска і Гусева (Калінінградская вобл., Расія).

Юныя мастакі пачалі работу з самай раніцы – выбіралі віды, рабілі накіды, падбіралі тэхнікі. Шмат хто размясціўся на цэнтральнай алеі, адкуль добра бачныя і галоўны будынак цэнтра, і дом, і фантан. Хтосьці выбіраў больш патаемныя месцы сярод дрэў з цікавымі ракурсамі і відамі. Некалькі рабят накіраваліся ў вегетарый да экзатычных растлін. Усяго праз некалькі гадзін дзеці прадставілі свае малюнкі на суд журы, якое склалі педагогі і эксперты праекта "На сваёй зямлі".

Работы ацэньваліся ў некалькіх узроставых групах і дзьвух намінацыях – "Жывапісь" і "Графіка". Графічных работ было няшмат і ўсе яны адзінадушна былі ўхвалены журы. А вось ваколг жывапісных работ было шмат спрэчак, асабліва аўтараў 11-12 гадоў. Тым не менш у кожнай рабоце члены жури змаглі знайсці нешта цікавае – дзесьці нестандартны сюжэтны ход, дзесьці ўдалую дэталь, дзесьці ўменне справіцца з аркушам. З-за таго што пленэр быў нешматлікім, усім удзельнікам дасталіся ўзнагароды – дыпломы розных ступеняў або з заахвочвальнай фармуліроўкай. Але галоўнае, што атрымалі рэбята, – гэта вопыт удзелу ў пленэры-конкурсе.

Важным дапаўненнем дня стаў майстар-клас мастака Ганны Выгоннай па тэхніцы клёцкаграфіі (кляксаграфіі), якая дапамагае развіць пачуццё пятна, уяўленне і вобразнае мысленне. Пад кіраўніцтвам майстра дзеці стварылі па некалькі вобразных малюнкаў – рознакаляровых акварэльных плямаў, у якіх убачылі і зрабілі пазнавальнымі пры дапамозе штрыхоў і ліній вобразы жывёл, міфічных істот, людзей, прыродных і архітэктурных аб'ектаў. Некаторым нават удалося адлюстраваць у сваіх "клёцках" уражанні ад вандроўкі ў Мір і Нясвіж, дзе яны пабывалі напярэдадні.

Дзень завяршыўся ўзнагароджваннем удзельнікаў пленэра-конкурса, уручэннем дыпломаў і невялікім імправізаваным канцэртам ад супрацоўнікаў цэнтра.

Праект "На сваёй зямлі" абавязкова працягне практыку правядзення пазнавальных сустрэч для мастакоў – як юных, так і дарослых. Бліжэйшая – для мастакоў-педагогаў – адбудзецца з 20 па 28 чэрвеня.

Глядзець фотарэпартаж